旺角街頭又成為MMA擂台，上禮拜四（5日）一個多雲有驟雨嘅日子，中午12點幾嗰陣，有巿民揸車經過旺角豉油街近花園街停燈位，點知見到兩個男人喺馬路邊大打出手。着T恤牛仔褲孭背囊拎住把遮嘅四眼仔，同着紅衫短褲踢拖留鬚嘅阿叔，唔知為乜嘈起上嚟。
停燈嘅時間短短19秒，身形高高瘦瘦嘅四眼仔，先用右手拍紅衫阿叔塊臉，阿叔一手捉住佢隻手，然後兜巴星四眼仔以作還擊，結果四眼仔眼鏡都被打到飛埋落地，睇得出阿叔冇留力。兩個人拉拉扯扯，四眼仔不甘示弱推跌阿叔，兩人扭打起嚟，四眼仔推阿叔落地，用手上把遮扑打阿叔。
阿叔好快起番身，雙手捉實四眼仔兩個膝頭，在大概五秒之間，佢先係一手抱起佢就將四眼仔撻落地，紅衫阿叔繼而連環5鎚狂揼四眼仔塊臉，小記睇到都覺得場面好血腥，四眼仔似乎已經無力還擊，攤咗喺地下，但係阿叔仲唔收手，起身再大腳踩落四眼仔心口，然後慢慢行去着番一隻甩咗嘅拖鞋，睇怕四眼仔都好傷下。
短片去到呢度就完咗，因為巿民要開車。兩男打鬥嗰時街上面都有啲途人行過，但大家都係眼望望，冇人敢上去幫手，又唔知有冇人幫手報警，究竟四眼仔之後點冇人知，真係擔心佢有冇性命危險。
警方發言人表示，喺上周四(5日)朝早11時53分接到報案，指一名男子喺豉油街同花園街交界被人襲擊。警員到場之後，發現33歲姓王男子頭部受傷，事後送廣華醫院治理。警方經調查後，同日喺旺角拘捕38歲姓陳男子，涉嫌襲擊致造成實際身體傷害，陳已獲准保釋候查，須於8月上旬向警方報到。警方話，初步調查兩人早前因為手推車碰撞問題而爭執。案件交由旺角警區刑事調查隊第6隊跟進調查。k
